قازاقستان قىرعىزستانعا 10 ميلليون امەريكا دوللارىندىق كومەك بەرمەكشى

قازاقستاننىڭ زۇڭتۇڭى نازاربايەۆ شىلدەنىڭ 17 - كۇنى الماتىدا مىنانى ءبىلدىردى: قازاقستان قىرعىزستانعا 10 ميلليون امەريكا دوللارىندىق شۇعىل كومەك بەرەدى.

نازاربايەۆ سول كۇنى وتكىزىلگەن ەۆروپا حاۋىپسىزدىك جانە ىنتىماقتاستىق ۇيىمىنا مۇشە ەلدەردىڭ سىرتقى ىستەر مينيسترلەرىنىڭ بەيرەسمي ماجىلىسىندە بىلاي دەدى: قىرعىزستاندا 5 جىلدان بەرى ەكى رەت اكىميات اۋىستى، بۇل جاعداي ەكونوميكانىڭ دامۋى توقىراپ، حالىق تۇرمىسىنىڭ ناشارلاۋىنان جانە ۇكىمەتتىڭ باسقارۋى كەمەلسىز بولۋدان كەلىپ شىققان. قىرعىزستاننىڭ ءارقايسى ساياسي توپتارىنىڭ پارلامەنت سايلاۋىن توڭىرەكتەپ جۇرگىزگەن كۇرەسىنىڭ شيەلەنىسۋىنە بايلانىستى قىرعىزستاننىڭ قازىر ارەڭ ساقتاپ تۇرعان ورنىقتىلىق جاعدايى دا اسقىنۋى مۇمكىن.

اۋعانستان ماسەلەسىنە توقتالعاندا نازاربايەۆ بىلاي دەدى: ەۆروپا حاۋىپسىزدىك جانە ىنتىماقتاستىق ۇيىمى اۋعانستاننىڭ ورنىقتىلىعىن قالپىنا كەلتىرۋ جونىندە جاڭا ستراتەگيا بەلگىلەپ، حالىقارالىق جاراستىرۋدى كۇشەيتۋى كەرەك. حالىقارالىق قوعام اۋعانستان ۇكىمەتىنىڭ تاليبانداردى قامتىعان ءار جاقتاعى كۇشتەر قاتىناسقان بەيبىتشىلىك اياق الىسى جونىندەگى ساياساتىن قولداپ - قۋاتتاۋى كەرەك.

نازاربايەۆ بىلاي دەدى: قاتىستى ەلدەردىڭ اۋعانستاننىڭ اۋىل شارۋاشىلىعىن عىلمي جولمەن دامىتۋ ستراتەگياسىن بەلگىلەۋىنە كومەكتەسكەنى ءجون، بۇل اۋعانستاننىڭ اپيىن ءوندىرۋ جانە ەسىرتكى اتكەزشىلىك ەتۋ ارەكەتتەرىن ازايتۋىنا ءتيىمدى.

ەۆروپا حاۋىپسىزدىك جانە ىنتىماقتاستىق ۇيىمىنىڭ كەزەكتى ءتوراعاسى، قازاقستاننىڭ سىرتقى ىستەر مينيسترى قانات ساۋدابايەۆتىڭ ۇسىنىسى بويىنشا ەۆروپا حاۋىسىزدىك جانە ىنتىماقتاستىق ۇيىمىنا مۇشە 56 ەل مەن 12 سەلبەستىك سەرىكتەس ەلدىڭ سىرتقى ىستەر مينيسترلەرى نەمەسە جوعارى دارەجەلى ءمانساپتىلارى جانە حالىقارالىق ۇيىمداردىڭ ۋاكىلدەرى شىلدەنىڭ 16 - كۇنىنەن 17 - كۇنىنە دەيىن الماتى قالاسىندا بەيرەسمي كەڭەس وتكىزگەن بولاتىن.