ءداستۇرلى ويلاۋ فورماسىن بۇزىپ، مالشىلاردىڭ تۇرمىس ورەسىن جوعارىلاتايىق

ىلە اڭعارىندا مالشىلاردى وتىرىقتاندىرۋدىڭ تىڭ جولى قاراستىرىلدى

 ءتىلشىمىز شۇي جيجى حابارلايدى. كۇنەس اۋدانى سوربۇلاق قالاشىعىنىڭ قۇمتوبە قىستاعى مالشىلاردى وتىرىقتاندىرۋداعى ءداستۇرلى كوزقاراستى بۇزۋعا كۇش سالدى. ماۋسىمنىڭ 30 - كۇنى ءتىلشى قۇمتوبە قىستاعىنداعى وتىرىقتاندىرىلعان 114 مالشىنىڭ قورا - قالتقىسى مەن ۇيلەرىنىڭ اراسىنان شامامەن 500 مەتر جول قالدىرىپ پىلانداعانىن كورگەن.

قۇمتوبە قىستاعى جالاڭ مال شارۋاشىلىعىمەن شۇعىلداناتىن قىستاق، بۇرىن قىستاقتاعى 284 وتباسى 20 كيلومەترلىك وڭىرگە بىتىراي قونىستانعان - دى. سوربۇلاق قالاشىعى بۇرىننان وسى قۇمتوبە قىستاعىن مالشىلاردى وتىرىقتاندىرۋداعى ءتۇيىن ەتۋدى ويلاستىرىپ كەلگەنىمەن، بىتىراي قونىستانعاندىقتان ولاردىڭ سۋ، ەلەكتر، جول سياقتى نەگىزدىك قۇرىلعىلارىن شەشۋ توتەنشە قيىن بولىپ، مالشىلاردىڭ وتىرىقتانۋى بۇرىننان ٪40 تەن اسپاعان. بۇل مالشىلاردىڭ تۇرمىسىنا وتە ءتيىمسىز بولۋمەن بىرگە، قىستاقتىڭ ءتۇرلى ىستەرىنىڭ دامۋىنا دا ورالعى بولعان.

بىلتىر سوربۇلاق قالاشىعى وي جەلىسىندە بۇرىلىس ج-اساپ، «ءۇي مەن قورا - قالتقىنى بۇكىلدەي ءبولۋ» پرينسيبى بويىنشا قالاشىق جاعىنان 630 مۋ جەر ءبولىپ بەرىپ، مەملەكەتتىڭ مالشىلاردى وتىرىقتاندىرۋعا بەرەتىن قوسىمشا قاراجاتى، حاۋىپتى ۇيلەردى وزگەرتۋ، سىلكىنىسكە ءتوزىمدى بەيقۇت ءۇي ينجەنەرياسى قۇرىلىسى سياقتىلارعا بەرىلەتىن قارجىنى بىرىكتىرىپ پايدالانىپ، تۇرمىس رايونى مەن ءوندىرىس رايونىن بۇكىلدەي بولەكتەمەكشى بولادى. تۇرمىس رايونىنداعى ءاربىر وتباسىنا ءبىر مۋدان اۋلالىق جەر بەرىپ، ءوندىرىس رايونىندا وتباسى سايىن 80 شارشى مەترلىك قورا - قالتقى، قورانىڭ جانىنان 20 شارشى مەترلىك كۇزەت ءۇيىن سالۋدى ءبىر تۇتاس پىلاندايدى. سونىمەن بىرگە، قورا - قالتقىنى 2.2 مەتر بيىكتىكتەگى داۋالمەن قورشاپ، جەم - ءشوپ تاسيتىن جانە قىستاق كۇزەتشىلەرى كىرىپ - شىعاتىن ەكى ەسىك قالدىرعان.

ءۇي مەن قورا - قالتقىنى ءبولىپ ورنالاستىرۋ مالشىلاردىڭ تۇرمىسى مەن وندىرىسىنە قولايسىز بولماي ما دەگەن كۇدىكتى  سۇراۋىمىزعا  وبلىستىق مال شارۋاشىلىق - مال شيپاگەرلىك مەكەمەسى پارتگرۋپپاسىنىڭ شۋجيى حوۋ جيانشين بىلاي دەپ جاۋاپ بەردى: «ءوندىرىستى وركەندەتۋ، تۇرمىستى جاقسارتۋ، باسقارۋدا دەموكراتيالى بولۋ سياقتى جاقتاردان العاندا، وتىرىقتاندىرۋ قۇرىلىسى جاڭاشا اۋىل - قىستاق قۇرىلىسىمەن بىردەي بولعان. مالشىلاردى ءوندىرىس رايونى مەن تۇرمىس رايونىنا ءبولۋ ارقىلى ءبىر جاعىنان، ادام مەن مالدىڭ جۇقپالى اۋرۋمەن بىردەي جۇعىمدالۋىنان ساقتانۋعا، ەندى ءبىر جاعىنان، وتىرىقتاندىرۋدىڭ ورتاسىن ساپالىلاندىرۋعا ءتيىمدى».

مالىن كوزىنەن تاسا قىلماي ۇيرەنگەن مالشىلار جونىنەن العاندا، ءوندىرىس رايونى مەن تۇرمىس رايونىن ءبولىپ، تۇرمىس جاعىنان قونىستانۋ ورتاسىن جاقسارتىپ، تۇرمىس ساپاسىن جوعارىلاتقاندىق بولادى؛ ونان كەيىن ءوندىرىس جاعىنان كارانتيندەۋ، اۋرۋدان ساقتانۋعا قولايلى بولىپ، مال مەن ادام اراسىندا اۋرۋ تارالۋدان ءونىمدى ساقتانۋعا بولادى. ءبىراق نەشە مىڭ جىلدىق ادەتتى اياق استىنان وزگەرتۋ وڭاي ەمەس، ءتىلشىنىڭ يەلەگەن حابارىنا قاراعاندا، ءىشىنارا مالشىلار ءالى دە قارايلاۋدا ەكەن، وبلىسقا توتە قاراستى ورىندارداعى نىلقى سياقتى از ساندى اۋداندا عانا ۇلگى كورسەتۋ ءتۇيىنى قۇرىلعان، مۇنداي ءادىستىڭ قالىپتاسۋىنا ۋاقىت قاجەت كورىنەدى.

حوۋ جيانشين مىڭ جىلعا جالعاسقان «ادام مەن مالدىڭ بىرگە جاساۋ» جاعدايىن وزگەرتۋدەگى سەنىمىن بىلاي ءبىلدىردى: «ەگەر مەن قازىر بولاشاقتا مالشىلار عيماراتتا وتىرىپ مال باعادى دەسەم كوپتەگەن ادام مەنى قالجىڭداپ تۇر دەۋى مۇمكىن. ءبىراق مەنىڭ قاراۋىمشا، بۇل ءبىر اۋقىم، مالشىلاردا اناعۇرلىم جاقسى تۇرمىس كەشىرۋدى ارماندايدى. سوندىقتان ءبىز مالشىلاردى وتىرىقتاندىرۋدا وسىلاي نىق قادام تاستاۋىمىز كەرەك».