تولىدا قورى مول التىن كەنى جۇلگەسى بايقالدى

جۋىقتا تولى اۋداندىق مەملەكەت جەر بايلىعى مەكەمەسىنەن ۇعىسۋىمشا، بۇل اۋدانىنىڭ جەر قىرتىسىنىڭ تەرەڭ قاتپارىنان التىن كەنىن ىزدەۋ، اشۋ جاعىنان قامال الىنىپ، قاتۋ كەنى جۇلگەسىنەن جاڭادان وپىرىلمالى قابات بايقالىپ، تىڭنان ارتقان التىن قورى 15 تونناعا جەتكەن. مامانداردىڭ ساراپتاۋىنشا، قاتۋ كەنى جۇلگەسىنەن مىڭ مەتر تەرەڭدىكتە كەن اشۋ كومەسكى كۇشى زور بولىپ، التىن قورى مول ەكەن.

تولى اۋداندىق مەملەكەت جەر بايلىعى مەكەمەسىنىڭ ورىنباسار باستىعى جاڭ يۇيفىڭنىڭ تانىستىرۋىنا قاراعاندا، بۇل اۋدان التىن كەنىن ىزدەۋ جاعىندا ەكى جىل كەن اشۋ جانە اناعۇرلىم ىشكەرىلەي بارلاۋ جۇرگىزۋ ارقىلى 600 دە مىڭ مەتر تەرەڭ قاتپاردا التىن قورىنىڭ اسا مول ەكەنىن تۇراقتاندىرعان، بارلاۋ قىزمەتكەرلەرى تەرەڭ قاتپاردى بۇرعىلاۋ تەحنيكاسىن قولدانىپ، قاتۋ كەنى جۇلگەسىندە مىڭ مەتر تەرەڭدىككە دەيىن بۇرعىلاۋ جۇرگىزگەن. قازىرگە دەيىن مىڭ مەتردەن تومەن جەردە تىڭنان 15 توننا التىن قورى ساقتالعان، جەرگىلىكتى كەن ماماندارىنىڭ زەرتتەۋىنە قاراعاندا، قاتۋ كەنى جۇلگەسىندە مىڭ مەتردەن تومەندەگەن سايىن التىن قورى مولشەرى دە كوبەيىپ وتىرۋداي كومەسكى كۇشى ادامداردى قايران قالدىرعان. قازىر وسى اۋدان كولەمىندەگى بارلانعان كەن الابى داربىت جانە قاتۋ كەن الابى بولىپ، ولاردىڭ گەولوگيالىق قۇرىلىمى كۇردەلى ەكەن، الايدا بۇل توتەنشە تاماشا التىن كەن بايلىعى ابزالدىعىن بايقاتقان. جاڭادان بايقالعان قاتۋ كەنى جۇلگەسىنىڭ مىڭ مەتر تەرەڭ قاتپارىنداعى التىننىڭ ساپاسى ءبىرشاما جوعارى، التىن مولشەرى جىل سايىن ارتىپ وتىراتىندىعى مەجەلەنۋدە ەكەن، مەجەمەن بيىلعى التىن مولشەرى بىلتىرعىدان 3.5 توننا ارتپاقشى.

ۇعىسۋعا قاراعاندا، تولى اۋدانى كولەمىندە كەن بايلىعى مول بولىپ، قازىر 39 ءتۇرلى كەن بايلىعى، 416 كەن ورنى بايقالعان، مۇنىڭ ىشىندە كومىردىڭ بولاشاقتىق ساقتالۋ مولشەرى ءبىر ميلليارد 500 ميلليون توننا، التىننىڭ بولاشاقتىق ساقتالۋ مولشەرى 500 توننادان استام، حروم كەنىنىڭ بولاشاقتىق ساقتالۋ مولشەرى 2 ميلليون 500 مىڭ توننادان استامعا جەتكەن. 2008 - جىلدان بەرى تولى اۋدانىنىڭ التىن ءونىمى مولشەرى قاۋىرت ارتىپ، «شينجياڭدا التىن وندىرىسىندە 1 - اۋدان» اتانىپ كەلەدى.

ياڭ تاۋ