جاڭ چۇنشيان اۆتونوميالى رايوندىق پارتكوم تۇراقتى كوميتەتىنىڭ (كەڭەيتىلگەن) ءماجىلىسىن باسقارىپ اشتى

جالپىلىق قاتىناس جانە ەنەرگيا قۇرىلعى نەگىزدىك قۇرىلىسى قىزمەتى جونىندە ارناۋلى تالقى ورىستەتىلدى

ۇسىنىس ەتىلگەن ءتىلشىمىز چىڭ ليشين حابارلايدى. شىلدەنىڭ 2 - كۇنى تۇستەن بۇرىن اۆتونوميالى رايوندىق پارتكومنىڭ شۋجيى جاڭ چۇنشيان  اۆتونوميالى رايوندىق پارتكوم تۇراقتى كوميتەتىنىڭ (كەڭەيتىلگەن) ءماجىلىسىن باسقارىپ اشتى. ماجىلىستە جالپىلىق قاتىناس جانە ەنەرگيا نەگىزدىك قۇرىلىعى قۇرىلىسى قىزمەتىن ىلگەرىلەتۋ جونىندە ارناۋلى تالقى ورىستەتىلدى.

جاڭ چۇنشيان ءماجىلىس باستالاردا ءسوز سويلەپ بىلاي دەدى: ج ك پ اۆتونوميالى رايوندىق 7 - كەزەكتى كوميتەتىنىڭ 9 - جالپى (كەڭەيتىلگەن) ماجىلىسىندە شينجياڭ ەكونوميكاسىنىڭ قارىشتاپ دامۋىنا تۇساۋ بولاتىن نەگىزگى فاكتورلار مەن كەلەسى قادامدا مىقتى يگەرىلەتىن ءتۇيىندى قىزمەتتەر جونىندە جان - جاقتى تالداۋ جاسالدى، مۇندا قاتىناس نەگىزدىك قۇرىلعى قۇرىلىسى مەن ەنەرگيا نەگىزدىك قۇرىلعى قۇرىلىسى قامتىلدى. جاڭ چۇنشيان بىلاي دەدى: ءبىز «كورىكتى شينجياڭ» سىندى وسى ءبىر الىپ قۇرىلىستىڭ جوبالاۋشىلارىمىز جانە قۇرۋشىلارىمىز، تاعان قانشا بەرىك بولسا، سالعان ءۇي دە سونداي مىقتى بولادى. ءبىز نەگىزدىك قۇرىلعى قۇرىلىسىنا، ءسوزجوق، وسكەلەڭ تۇرعىدان ءمان بەرىپ، يدەيانى ونان ارى بىرلىككە كەلتىرىپ، تانىمدى جوعارىلاتىپ، وسى جۇمىستى تەز ارادا اقىلداسىپ ورنالاستىرۋىمىز كەرەك. ماجىلىستە جالپىلىق قاتىناس جانە ەنەرگيا سىندى 2 نەگىزدىك قۇرىلعىعا قاتىستى قىزمەتتەردى مىقتى يگەرۋ ءتۇيىن ەتىلدى.

ونان سوڭ اۆتونوميالى رايوننىڭ قاتىستى تاراۋلارىنداعى جاۋاپتى جولداستار تاس جول، تەمىر جول، حالىقتىق اۆياتسيا جانە ەنەرگيا نەگىزدىك قۇرىلعى قۇرىلىسى سياقتى جاقتاردان مالىمەت بەردى.

2009 - جىلدىڭ سوڭىنا دەيىن اۆتونوميالى رايونىمىزدا تاس جولدىڭ جالپى ۇزىندىعى 119 مىڭ كيلومەترگە جەتتى، بيىل تاس جول قاتىناس قۇرىلىسىنىڭ اياق الىسى ٪33 تە ٪66 جەدەلدەتىلدى، تۇتاس جىلدا 12 مىڭ كيلومەتر تاس جول سالىنىپ، شينجياڭداعى تاس جولدىڭ جالپى ۇزىندىعى 120 مىڭ كيلومەترگە جەتكىزىلدى. 12 - بەس جىلدىق جوبا كەزىندە شينجياڭدا توڭىرەكتىڭ ءتورت بۇرىشىنا قاتىنايتىن جوعارى قارقىندى، جوعارى دارەجەلى تاس جول تورابى قالىپتاسىپ، مەملەكەت دارەجەلى 7 تاس جول تاسىمال قۇرىلىسى، شىعىستا ىشكى ولكەلەرگە قاتىنايتىن 4 تاس جول، باتىستا شەتەلدەرگە قاتىنايتىن 8 تاس جول، جيىنى 12 ءىرى تاس جول سالىنادى. 2010 - جىلى شينجياڭنىڭ ەنەرگيا سالاسىنداعى ءتۇيىندى قۇرىلىس وبيەكتىلەرى 126 عا  جەتىپ، وعان 572 ميلليارد 800 ميلليون يۋان قارجى قوسىلادى، سونىمەن بىرگە، مۇناي، تابيعي گاز بايلىعىن اشۋ جانە مانەرلەۋ، قامداۋ نەگىزدىك قۇرىلىسى جەدەلدەتىلىپ، بۇكىل شينجياڭدا تابيعي گاز ءبىر تۇتاس جەتكىزىلەدى جانە باسقارىلادى. 2015 - جىلدىڭ سوڭىنا دەيىن تۇتاس رايونىمىزدا ەلەكتر گەناراتور اگراگاتتارىنىڭ جالپى سيىمدىلىعى 41 ميلليون 800 مىڭ كيلوۆات - ساعاتقا جەتەدى.

مالىمەتتى تىڭداعان سوڭ جاڭ چۇنشيان بىلاي دەدى: شينجياڭنىڭ سوڭعى جىلداردان بەرگى جالپىلىق قاتىناس قۇرىلىسى مەن ەنەرگيا قۇرىلىسىن تۇراقتاندىرۋعا بولادى، قاتىستى تاراۋلارداعى جولداستار قىزمەتتى تاباندىلىقپەن ىستەپ، قيىنشىلىقتاردى جەڭىپ، قالتقىسىز ۇلەس قوسىپ، شينجياڭنىڭ تاس جول، تەمىر قول، حالىقتىق اۆياتسيا، ەنەرگيا قۇرىلىسى اياق الىسىنىڭ جەدەلدەۋىن جەبەپ، نەگىزگى وي جەلىنى ايقىنداپ، الداعى قاۋىرت دامۋعا بەرىك نەگىز قالادى. الايدا، ءبىز جالپىلىق قاتىناس پەن ەنەرگيا قۇرىلىسىنىڭ كەمەلدەنبەۋىنىڭ شينجياڭنىڭ قارىشتاپ دامۋىنا تۇساۋ بولىپ كەلە جاتقان ماڭىزدى فاكتورلاردىڭ ءبىرى ەكەندىگىن، ءسوز جوق، سەرگەكتىكپەن كورە ءبىلۋىمىز كەرەك. قاتىناس - تاسىمال ۇلكەن ارناسى ءالى قۇرىلعان جوق، تاس جولدىڭ جيىلىگى بۇكىل ەلىمىزبەن سالىستىرعاندا الدەقايدا ارتتا، تەمىر جول قاتىناسىنا تۇساۋ بولاتىن ماسەلەلەر اۋىر، شينجياڭ كولەمىندەگى اۋەجايلار مەن حالىقارالىق اۋە لەنياسى جولاۋشىلاردىڭ قاجەتىن قاناعاتتاندىرا الماي وتىر، ءىشىنارا رايونداردا ەلەكتر كلافانىن باسىپ تاستايتىن جايتتەر ءالى دە ءومىر ءسۇرىپ وتىر...  

وسىنىڭ ءبارى بىزگە جالپىلىق قاتىناس پەن ەنەرگيا نەگىزدىك قۇرىلعى قۇرىلىسىنا، ءسوز جوق، ءمان بەرۋىمىز كەرەكتىگىن، مۇنىڭ قارىشتاپ دامۋ مەن باياندى تىنىشتىقتى ساقتاۋدىڭ قاجەتى ەكەندىگىن؛ حالىق تۇرمىسىنا قاتىستى ينجەنەريا، حالىقتىڭ تۇرمىس ساپاسىن جاقسارتۋعا قاتىستى ينجەنەريا؛ بازار شارۋاشىلىعى مەن ەسىك اشۋدىڭ قاجەتى ءارى ىشكى سۇرانىمدى ارتتىرىپ، تۇتىنۋدى ىلگەرىلەتىپ، كاسىپتەنۋدى جەبەۋدىڭ قاجەتى ەكەندىگىن ەسكەرتىپ وتىر.

جاڭ چۇنشيان مىنانى باسا دارىپتەدى: ءىرى جول توراپ قۇرىلىسى مەن حالىق تۇرمىسى نەگىزدىك قۇرىلعى قۇرىلىسىنا باسا ءمان بەرۋ كەرەك. ءارقايسى ايماق، وبلىس، قالالاردى جوعارى قارقىندى تاس جولمەن تۇتاستىرىپ، توڭىرەكتىڭ ءتورت بۇرىشىنا قاتىنايتىن تاس جول تورابىن قالىپتاستىرۋ كەرەك. اۋىل - قىستاقتاردا حالىقتى اۋقاتتاندىرىپ، قاتىناستى ىركىلىسسىزدەندىرۋ ينجەنەرياسىن اناعۇرلىم مىقتى يگەرىپ، اۋىل - قىستاق تاس جول تورابىن ويداعىداي قۇرۋ؛ قاتىناس نەگىزدىك قۇرىلعى وبيەكتىلەرىنىڭ الدىڭعى كەزەكتىك دايىندىق قىزمەتتەرىن كۇشەيتىپ، بازاردى ونان ارى ايقارا اشىپ، تەكسەرىپ - بەكىتۋ رەسمياتتارىن قىسقارتۋ؛ سالىنىپ جاتقان قۇرىلىس وبيەكتىلەرىنىڭ اياق الىسىن جەدەلدەتىپ، تىڭ قۇرىلىس وبيەكتىلەرىن سالۋدى جەدەلدەتۋ؛ ەنەرگيا جاعىندا شينجياڭ كولەمىندەگى قاتتى كەن ونىمدەرى بايلىعىن ارقاۋ ەتىپ، عىلمي، ءتارتىپتى اشۋ جانە ءبىر تۇتاس باسقارۋ قاجەت.

اۆتونوميالى رايوندىق پارتكومنىڭ ورىنباسار شۋجيى، اۆتونوميالى رايوننىڭ ءتوراعاسى نۇر باكىر بىلاي دەدى: كولەمدى نەگىزدىك قۇرىلعى قۇرىلىسى بولمايىنشا، شينجياڭنىڭ قاۋىرت دامۋىنان اۋىز اشۋعا بولمايدى. نەگىزدىك قۇرىلعى، اسىرەسە، قاتىناس نەگىزدىك قۇرىلعى قۇرىلىسىنىڭ ماڭىزدىلىعى مەن كوكەيتەستىلىگى جونىندەگى تانىمدى ونان ارى جوعارىلاتىپ، قۇرىلىس وبيەكتىلەرىن جوعارى دەڭگەيدە، جوعارى ورەدە، جوعارى ونىمدىلىكتە ورىستەتۋ كەرەك. قارجى قوسۋ تەبىنىن ارتتىرىپ، مەملەكەتتىڭ قولداۋىنا تەز ارادا يە بولۋ قاجەت. وبيەكتىلەردىڭ الدىڭعى كەزەڭدىك دايىندىق قىزمەتتەرىن بارىنشا ويداعىداي ىستەپ، نەگىزدىك قۇرىلعى قۇرىلىسى ارقىلى شينجياڭنىڭ ەكونوميكاسىنىڭ قارىشتاپ دامۋىن ىلگەرىلەتۋ قاجەت. اۆتونوميالى رايون باسشىلارىنان ەركىن يمىرباقى، اۆتونوميالى رايوندىق پارتكومنىڭ تۇراقتى مۇشەلەرى، اۆتونوميالى رايوندىق حالىق ۇكىمەتىندەگى قاتىستى ورىنباسار ءتوراعالار، پارتگرۋپپا قۇرامىنداعىلار، اۆتونوميالى رايوندىق پارتكوم مەن حالىق ۇكىمەتىندەگى قاتىستى ورىنباسار باس حاتشىلار ماجىلىسكە قاتىناستى.   

(«شينجياڭ گازەتىنەن الىندى»)