پويەز گۋدوگى تاريحتى جاڭالاپ، عاسىرلىق ارمان ىسكە استى

قۇلجادان  ۇرىمجىگە  تۇڭعىش جولاۋشىلار پويەزى قاتىنادى

ءتىلشىمىز شۇي جيجى حابارلايدى. تاريحقا ۇمتىلماس وتكەن ىستەر جازىلادى، شىلدەنىڭ 1 - كۇنى تۇستەن كەيىن قۇلجا پويەز بەكەتىندە قالا تۇرعىندارىنىڭ قىزىعا قاراعان جانارلارى، جولاۋشىلاردىڭ شاتتانعان ءجۇزى، تەمىر جول قۇرىلىسشىلارىنىڭ ءتارتىپتى قىزمەتى، باسشى كادرلاردىڭ جادىراعان بەينەسى قۇلجادان ۇرىمجىگە اتتانعان 5816  - رەتكى  جولاۋشىلار پويەزىنىڭ اتتانۋى وبلىسىمىزدىڭ تاريحىنا شۇعىلالى داستان بولىپ جازىلدى.

شىلدەنىڭ 1 - كۇنى ساعات 20 دان 30 مينۋت وتكەندە قۇلجادان ۇرىمجىگە تۇڭعىش جولاۋشىلار پويەزىن اتتاندىرۋ سالتى قۇلجا پويەز بەكەتىندە وتكىزىلدى، اۆتونوميالى وبلىس باسشىلارىنان لي شياڭلين، ماۋكەن سەيىتقامزا ۇلى، تۇرسۇن تۇردى، ساۋىتبەك نۇرلان ۇلى، جاڭ يۇن، ۋان شۇي، جياۋ باۋحۋا، بۇراتالا موڭعۇل اۆتونوميالى وبلىسىنىڭ ورىنباسار باستىعى دا لىڭتا، اۋىل شارۋاشىلىق 4 - ديۆيزياسىنىڭ كوميسسارى جاڭ يۇڭ جانە ءۇرىمجى تەمىر جول مەكەمەسىنىڭ باسشىلارى تاڭ شىشىڭ، گۋان يالين قاتارلىلار  سالتقا قاتىناستى ءارى لەنتا قيدى، جىڭ - قۇلجا - قورعاس تەمىر جولى جۇمىسى ءۇشىن  10 نەشە جىل قۇلشىنىس جاساعان اۆتونوميالى وبلىستىڭ ۇنەمىلىك ىستەرگە جاۋاپتى بۇرىنعى ورىنباسار باستىعى ياڭ يۇيجۇن سالتقا ۇسىنىسپەن قاتىناستى.

جىڭ - قۇلجا - قورعاس تەمىر جولى - شينجياڭداعى تۇڭعىش ەلەكترلى تەمىر جول، وسى تەمىر جولدا قاتىناعان جولاۋشىلار پويەزى ىلەدەگى ءار ۇلت حالقىنىڭ عاسىرلىق ارمانىن جۇزەگە اسىرۋمەن بىرگە، ىلە اڭعارىنىڭ نەگىزدىك قۇرىلعى شارت - جاعدايى مەن قارجى قوسۋ ورتاسىن جاقسارتىپ، تەمىر جول جاعالاۋىنداعى بۇقاراعا بايلىق باعىشتاپ، سىرتقا قاقپا اشۋ ورەسىن جوعارىلاتىپ، ەكونوميكا مەن قوعامنىڭ جەدەل دامۋىن جەبەۋدە تەرەڭ دە كەلەلى ىقپال جاسايدى.

وبلىستىق پارتكومنىڭ ورىنباسار شۋجيى، وبلىس باستىعى ماۋكەن سەيىتقامزا ۇلى ارناۋ سوزىندە قۇلجادان ۇرىمجىگە جولاۋشىلار پويەزىنىڭ قاتىناعاندىعىن قىزۋ قۇتتىقتادى ءارى تەمىر جول قۇرىلىسىنا قاتىناسقان بارلىق قۇرىلىسشىعا وسكەلەڭ قۇرمەت ءبىلدىردى، جىڭ - قۇلجا - قورعاس تەمىر جول قۇرىلىسىنا ءمان بەرگەن، ونى قولداپ - قۋاتتاعان ءار دارەجەلى باسشىلارعا، ءار سالا قايراتكەرلەرىنە جانە ءار ۇلت كادر - جۇرتشىلىعىنا شىنايى العىس ايتتى، تۇڭعىش كەزەكتى جولاۋشىلار پويەزىنە وتىرعان ءار ۇلت جولاۋشىلارىنا تاماشا تىلەك ايتتى.

ماۋكەن سەيىتقامزا ۇلى بىلاي دەدى: جىڭ - قۇلجا - قورعاس تەمىر جولى - ورتا ازياداعى حالىقارالىق كۇرە تامىر، ىلەنىڭ دامۋىنداعى ەكونوميكالىق لەنيا، قوعامنىڭ ورنىقتىلىعىنداعى ساياسي لەنيا، ءار ۇلت حالقىنىڭ باقىت لەنياسى. جىڭ - قۇلجا - قورعاس تەمىر جولىندا جولاۋشىلار پويەزىنىڭ قاتىناۋى ىلەدە تەمىر جول، تاس جول، اۆياتسيا ءبىر تۇلعالانعان وسىزاماندانعان قاتىناس تورىن قالىپتاستىردى، بۇل ءبىزدىڭ ەكونوميكا مەن قوعامنىڭ دامۋىن جەدەلدەتىپ، ءار ۇلت جۇرتشىلىعىنىڭ تۇرمىسىن جاقسارتۋىمىزدا، ۇلتتار ىنتىماعىن ىلگەرىلەتىپ وتان شەكاراسىن بەكەمدەۋىمىزدە توتەن-شە كەلەلى ماڭىزعا يە. وتە - موتە، جىڭ - قۇلجا - قورعاس تەمىر جولى قازاقستان تەمىر جولىمەن تۇتاسقاننان كەيىن ىلە مەن ورتا ازياداعى ەلدەردىڭ تىكە بايلانىس جاساۋىنا قولايلى بولىپ، ىلەنىڭ باتىسقا قاقپا اشۋداعى جاراتىلىستىق ابزالدىعىن ونان ارى كورنەكتىلەندىرىپ، ىلەنىڭ ەكونوميكاسىنىڭ دامۋى ءۇشىن ومىرشەڭدىك قۋات باعىشتايدى. وبلىستىق پارتكوم مەن ۇكىمەت تەمىر جول تاراۋلارىنىڭ قىزمەتىن بار كۇشپەن قولداپ - قۋاتتايدى جانە وعان سەلبەسىپ، تەمىر جول تاسىمالىندا ءدوپ كەلگەن ءتۇرلى قيىنشىلىقتار مەن ماسەلەلەردى بەلسەنە شەشىپ، جىڭ - قۇلجا - قورعاس تەمىر جولىنىڭ رولىن تولىق ساۋلەلەندىرەدى. سونىمەن بىرگە، ءار ۇلت كادرلارى مەن جۇرتشىلىعىن ورتانى قورعاۋ تانىمىن جوعارىلاتۋعا تاربيەلەپ، جول جاعالاۋىنداعى ەكولوگيالىق ورتانى شىنايى ويداعىداي قورعايدى.

 وبلىستىق پارتكومنىڭ شۋجيى لي شياڭلين تىلشىگە بىلاي دەدى: جىڭ - قۇلجا - قورعاس تەمىر جولىنىڭ ىسكە قوسىلۋى اۆتونوميالى وبلىسىمىزدىڭ دامۋ ابزالدىعى مەن كومەسكى كۇشىنىڭ اناعۇرلىم ايقىن كورنەكتىلەنگەندىگىنىڭ بەينەسى، بۇل ءىرى كاسىپورىن، ءىرى توپتاردىڭ ىلەدە ىرگە تەبۋىنە شارت - جاعداي ازىرلەپ، اۆتونوميالى وبلىسىمىزدىڭ سەكىرمەلى دامۋى مەن باياندى تىنىشتىعىن جۇزەگە اسىرۋىندا كەلەلى ءمان الادى. وبلىستىق پارتكوم مەن ۇكىمەت تەمىر جولعا سۇيەنىپ، ەكولوگالىق وبلىس قۇرۋ، وبلىستى عىلىم - تەحنيكا، وقۋ - اعارتۋ ارقىلى كوركەيتۋ، ابزال بايلىقتى كادەگە جاراتۋ، سىرتقا ەسىكتى ايقارا اشۋ جانە باياندى دامۋ ستراتەگياسىن تاباندىلىقپەن اتقارىپ، جاڭاشا ونەركاسىپتەنۋدى، ەگىن، مال شارۋاشىلىعىن وسىزامانداندىرۋدى، جاڭاشا قالا - قالاشىقتانۋدى، ساياحاتتى وركەندەتۋدى، سىرتقا باعىتتالعان شارۋاشىلىقتى جانە قوعامدىق ىستەردىڭ دامۋىن ىلگەرىلەتۋدە قوماقتى ناتيجەگە قول جەتكىزىپ، اناعۇرلىم گۇلدەنگەن، باي، ورنىقتى، جاراسىمدى ىلە قۇرۋعا قۇلشىنادى.

ۇعىسۋعا قاراعاندا، ۇرىمجىدەن قۇلجاعا قاتىناعان 6/5815 رەتكى جولاۋشىلار بويەزىنە جاڭا تيپتى اۋا تەڭشەگىش ورناتىلعان، وندا جۇمساق توسەكتى 2 ۆاگون، قاتتى توسەكتى 10 ۆاگون، قاتتى ورىندىقتى 4 ۆاگون بار ەكەن. پويەز قۇلجا بەكەتىنەن ءار كۇنى ساعات 20 دان 50 مينۋتتا جولعا شىعىپ، ەرتەسى ساعات 8 دەن 35 مينۋتتا ءۇرىمجى بەكەتىنە جەتەدى؛ ءۇرىمجى بەكەتىنەن ءار كۇنى ساعات 21 دەن 05 مينۋتتا جولعا شىعىپ، ەرتەسى ساعات 8 دەن 35 مينۋتتا قۇلجا بەكەتىنە كەلەدى. شينجياڭ بويىنشا 27 تەمىر جول تاسىمال بەكەتى مەن پويەز بەلەتىن ۋاكىلەتتى ساتاتىن 31 ورىندا پويەز بەلەتى ساتىلادى، جىڭ -قۇلجا - قورعاس تەمىر جول لەنياسىنداعى بەلەت ساتۋ ورىندارىندا مەملەكەتتىڭ جەر - جەرىنە باراتىن پويەز بەلەتتەرى ساتىلادى ەكەن.

سۋرەتتە: لي شياڭلين، ماۋكەن سەيىتقامزا ۇلى جانە ءۇرىمجى تەمىر جول مەكەمەسىنىڭ باسشىسى تۇڭعىش قاتىناعان جولاۋشىلار پويەزىنە ارناپ لەنتا قيۋدا.

سۋرەتتى شۇي جيجى تۇسىرگەن

سۋرەتتە: تۇڭعىش قاتىناعان جولاۋشىلار پويەزى قۇلجا بەكەتىنەن باياۋ شىعىپ بارادى

سۋرەتتى ليۋ چىڭگاڭ تۇسىرگەن

