اۋدارما جانە اتاۋ - تەلىمدەردى ارناعا ءتۇسىرۋ جونىندە كەلەلى كەڭەس بولىپ ءوتتى

شينجياڭ گازەتىنىڭ ءتىلشىسى كۇناي قۋاتاي قىزى حابارلايدى. اۆتونوميالى رايونىمىزداعى قازاق تىلىندەگى پارتيا گازەتتەرىنىڭ اۋدارما جانە اتاۋ - تەلىمدەردى ارناعا ءتۇسىرۋ جونىندەگى 3 - كەزەكتى قىزمەت تالقى جيىنى 20 - ماۋسىمدا التاي ايماعىنىڭ قابا اۋدانىندا اشىلدى. جيىندى ىلە گازەتى مەكەمەسىنىڭ باقىلاۋشىسى بەيىلقان مۇقاش ۇلى باسقاردى. جيىنعا «شينجياڭ گازەتى» مەكەمەسىنىڭ ورىنباسار باس رەداكتورى تەگىس زايبەك ۇلى، ىلە وبلىستىق پارتكوم مەن حالىق ۇكىمەتىنەن، التاي ايماقتىق پارتكوم مەن اكىمشىلىك مەكەمەسىنەن، سونداي - اق اۆتونوميالى رايون كولەمىندەگى ۇلكەندى - كىشىلى گازەت - جۋرنالداردان باسشىلار، ماماندار قاتىناستى. ىلە وبلىستىق ۇكىمەتتىڭ ورىنباسار باس حاتشىسى ەرمەك ايات ۇلى وبلىس باستىعى ماۋكەن سەيىتقامزا ۇلىنىڭ ءسوزىن وقىدى.

التاي ايماقتىق پارتكومنىڭ تۇراقتى مۇشەسى، ۇگىت ءبولىمىنىڭ باستىعى رازبەك قامزا ۇلى التاي ايماقتىق پارتكوم مەن اكىمشىلىك مەكەمەسى اتىنان جيىنعا قاتىناستى. جيىنعا قاتىناسۋشىلار اۋدارما ساپاسىن جوعارىلاتۋ، الا - قۇلا الىنىپ جۇرگەن اتاۋ - تەلىمدەردى بىرلىككە كەلتىرۋ، اۋدارما تۋىندىلارىن باعالاۋ، گازەت - جۋرنالدار ارا بارىس - كەلىستى كۇشەيتۋ، بارىنە بىردەي قولدانىلاتىن رەداكسيالىق ءتارتىپ بويىنشا جۇمىس جۇرگىزۋ جونىندە تىڭ ۇسىنىس، تاماشا ويلارىن ورتاعا قويىپ، قىزۋ تالقى ورىستەتتى.