حۋ جينتاۋ ج ك پ ورتالىق كوميتەتى ساياسي بيۋروسىنىڭ ءماجىلىسىن باسقارىپ اشتى

مەملەكەتتىڭ وقۋ - اعارتۋعا رەفورما جاساۋ جانە ونى دامىتۋ جونىندەگى ورتا، ۇزاق مەرزىمدىك جوبا پروگرامماسى قارالدى

شينحۋا اگەنتتىگى، بەيجيڭ، ماۋسىمنىڭ 21 - كۇنى. ج ك پ ورتالىق كوميتەتىنىڭ ساياسي بيۋروسى ماۋسىمنىڭ 21 - كۇنى ءماجىلىس اشىپ، «مەملەكەتتىڭ وقۋ - اعارتۋ رەفورماسى مەن دامۋى جونىندەگى ورتا، ۇزاق مەرزىمدىك دامۋ پروگرامماسىن» (2020 - 2010) قاراپ شىقتى ءارى ماقۇلدادى. ج ك پ ورتالىق كوميتەتىنىڭ باس شۋجيى حۋ جينتاۋ ءماجىلىستى باسقاردى.

ماجىلىستە مىناۋ اتاپ كورسەتىلدى: وقۋ - اعارتۋ - جاپپاي دوڭگەلەك داۋلەتتى قوعام قۇرۋدىڭ جاڭا تالابى، حالىقتىڭ جاڭا ءۇمىتى، حالىقاراداعى باسەكەنىڭ جاڭا جاعدايىن ەسكەرىپ، جۇڭگوشا سوتسياليزم ۇلى تۋىن بيىك ۇستاپ، دىڭ شياۋپيڭ نازارياسى مەن «ۇشكە ۋاكىلدىك ەتۋ» ماڭىزدى يدەياسىن جەتەكشى ەتىپ، عىلمي دامۋ كوزقاراسىن ىشكەرىلەي دايەكتىلەندىرىپ، پارتيانىڭ وقۋ - اعارتۋ باعىتىن جاپپاي تياناقتاندىرىپ، سوتسياليستىك مەكتەپ باسقارۋ بەتالىسىندا تاباندى بولىپ، وسىزاماندانۋعا، دۇنيە جۇزىنە، بولاشاققا بەت الىپ، وقۋ - اعارتۋ زاڭدىلىعى مەن دارىندىلاردى جەتىلدىرۋ زاڭدىلىعىنا بويسۇنىپ، الدىمەن دامىتۋ، ادام تاربيەلەۋدى نەگىز ەتۋ، رەفورما جاساۋ، جاڭالىق جاراتۋ، ادىلدىكتى جەبەۋ، ساپانى جوعارىلاتۋ قىزمەت باعىتىن مۇقيات دايەكتىلەندىرىپ، وقۋ - اعارتۋ ىستەرىنىڭ عىلمي دامۋىن جاپپاي جەبەپ، جۇرت رازى بولاتىن وقۋ - اعارتۋدى ويداعىداي باسقارىپ، ادام كۇشى بايلىعىندا قۇدىرەتتى مەملەكەت قۇرۋ كەرەك.

ماجىلىستە مىناۋ دارىپتەلدى: پارتيا مەن مەملەكەت قىزمەتىنىڭ جالپى جاعدايىندا وقۋ - اعارتۋدى بۇلجىماستان الدىمەن دامىتىلاتىن ستراتەگيالىق ورىنعا قويىپ، مەملەكەتتى عىلىم - تەحنيكامەن، دارىندىلارمەن گۇلدەندىرۋ ستراتەگياسىن بار كۇشپەن اتقارۋ كەرەك. ادامدى نەگىز ەتۋدە تاباندى بولىپ، ساپا وقۋ - اعارتۋىن جاپپاي اتقارىپ، وقۋشىلاردىڭ اقاۋسىز ءوسىپ - جەتىلۋىن جەبەۋدى مەكتەپ قىزمەتىنىڭ تياناعى جانە ماقساتى ەتىپ، وقۋشىلاردىڭ مەملەكەتكە، حالىققا قىزمەت وتەۋ قوعامدىق جاۋاپكەرلىگىن، باتىل ىزدەنەتىن جاڭالىق جاراتۋ رۋحى مەن ماسەلەنى شەشۋگە شەبەر بولۋداي امالياتتىق قۋاتىن بارىنشا جوعارىلاتىپ، احىلاق، اقىل - وي، دەنە جاقتارىنان جان - جاقتى جەتىلگەن سوتسياليزمنىڭ قۇرۋشىلارى مەن ءىزباسارلارىن تاربيەلەۋ كەرەك. رەفورما جاساپ، جاڭالىق جاراتۋدى وقۋ - اعارتۋدى دامىتۋدىڭ قۇدىرەتتى قوزعاۋشى كۇشى ەتىپ، دارىندىلاردى تاربيەلەۋ، مەكتەپ باسقارۋ، وقۋ - اعارتۋدى باسقارۋ تۇزىلىسىندە جاڭالىق جاراتىپ، وقىتۋ مازمۇنىنا، فورماسىنا، تاسىلىنە، دانەكەرىنە رەفورما جۇرگىزىپ، وقۋ - اعارتۋدىڭ اشىق ۇستالۋ اۋماعىن كەڭەيتۋ كەرەك. ادىلدىكتى جەبەۋدى مەملەكەتتىڭ نەگىزگى وقۋ - اعارتۋ ساياساتى ەتىپ، قالالار مەن اۋىل - قىستاقتى شارپىعان نەگىزدىك الەۋمەتتىك وقۋ - اعارتۋ قىزمەت وتەۋ جۇيەسىن قۇرىپ، الەۋمەتتىك وقۋ - اعارتۋ بايلىعىن ۇيلەسىمدى ءبولىپ، اۋىل - قىستاققا، شالعاي، كەدەي رايوندارعا، از ۇلت رايوندارىنا بەيىمدەلىپ، مەكتەپتەردى قۇلشىنا جاقسى باسقارىپ، وقۋشىلاردى جاقسى تاربيەلەپ، ازاماتتاردىڭ وقۋ - اعارتۋدان زاڭ بويىنشا يگىلىكتەنۋ ۇقىعىنا كەپىلدىك ەتۋ كەرەك. ساپانى جوعارىلاتۋدى وقۋ - اعارتۋ رەفورماسىنىڭ، دامۋىنىڭ وزەكتى مىندەتى ەتىپ، عىلمي وقۋ - اعارتۋ ساپاسى كوزقاراسىن ورناتىپ، وقۋ - اعارتۋدىڭ مازمۇن جاعىنان بايۋىنا ءمان بەرۋ كەرەك. جۇڭگوشا سوتسياليستىك وسىزاماندانعان وقۋ - اعارتۋ جۇيەسىن كەمەلدەندىرىپ، ءتىلاشار اعارتۋىن نەگىزىنەن جالپىلاستىرىپ، توعىز جىلدىق مىندەتتى اعارتۋ دەڭگەيىن بەكەمدەۋ جانە جوعارىلاتۋ، ورتا مەكتەپ باسقىشىنداعى وقۋ - اعارتۋدى جەدەل جالپىلاستىرىپ، كاسىپتىك اعارتۋدى زور كۇشپەن دامىتىپ، جوعارى مەكتەپ اعارتۋى ساپاسىن جاپپاي جوعارىلاتىپ، ۇزدىكسىز تاربيەلەۋدى جەدەل دامىتىپ، از ۇلتتاردىڭ وقۋ - اعارتۋ ىستەرىنە ءمان بەرۋ جانە قولداۋ كورسەتۋ، ەرەكشە اعارتۋعا كوڭىل ءبولۋ جانە كومەكتەسۋ كەرەك. وقىتۋشىلاردىڭ جالپىلىق ساپاسى مەن كاسىپتىك قابىلەتىن شىنايى جوعارىلاتىپ، ۇزدىك دارىندىلاردىڭ ۇزاق ۋاقىت، ءومىر بويى وقىتۋشىلىق ىستەۋىنە، جاپالى، كەدەي رايوندارعا بارىپ وقىتۋشىلىقپەن شۇعىلدانۋىنا دەم بەرىپ، وقىتۋشىلىق ءمورالى اسقاق، كاسىپتە ىسىلعان، قۇرىلىمى ۇيلەسىمدى، ومىرشەڭدىك كۇشكە تولى جوعارى ساپالى، ارنايىلانعان وقىتۋشىلار قوسىنىن قۇلشىنا قۇرۋ كەرەك. قارجى ۇسىنىلىمىنا كەپىلدىك ەتىپ، وقۋ - اعارتۋ قاراجاتىندا ۇكىمەتتىڭ قارجى قوسۋى نەگىز ەتىلگەن، كوپ جولمەن قارجى جينالاتىن قۇرىلىمدى كەمەلدەندىرىپ، تۇتاس قوعامنىڭ وقۋ - اعارتۋعا كوڭىل ءبولۋ بەلسەندىلىگىن قوزعاۋ كەرەك.

ماجىلىستە ءار دارەجەلى پارتكوم مەن ۇكىمەتتەن وقۋ - اعارتۋ قىزمەتىنە باسشىلىقتى شىنايى كۇشەيتىپ، وقۋ - اعارتۋدى الدىمەن دامىتۋدى تياناقتاندىرىپ، وقۋ - اعارتۋ ىستەرىنىڭ عىلمي دامۋىن جەبەۋدى ماڭىزدى مىندەت ەتىپ، مەملەكەتتىڭ وقۋ - اعارتۋ رەفورماسى مەن دامۋى جونىندەگى ورتا، ۇزاق مەرزىمدىك دامۋ پروگرامماسىنداعى مىندەت، شارانى شىنايى تياناقتاندىرىپ، تۇتاس پارتيا مەن قوعام وقۋ - اعارتۋدىڭ دامۋىنا كوڭىل بولەتىن، قولداۋ كورسەتەتىن تاماشا اۋان قالىپتاستىرۋى تالاپ ەتىلدى.