اۆتونوميالى رايوندىق 3 - كەزەكتى اقىندار ايتىسى اياقتادى

ءتىلشىمىز ەركىن سۇلتانوۆ حابارلايدى. 3 كۇنگە جالعاسقان اۆتونوميالى رايوندىق 3 - كەزەكتى اقىندار ايتىسى ماۋسىمنىڭ 18 - كۇنى شينجياڭ كوركەمونەر تەاترحاناسىندا شىمىلدىعىن جاپتى.

بۇل رەتكى اقىندار ايتىسىنا ىلە قازاق اۆتونوميالى وبلىسىنا توتە قاراستى اۋدان، قالالار التاي ايماعى، تارباعاتاي ايماعى، بۇراتالا موڭعۇل اۆتونوميالى وبلىسى، سانجى حۇيزۋ اۆتونوميالى وبلىسى، قۇمىل ايماعى، ىلە پەداگوگيكا شۋەيۋانىنىڭ كۇيتۇن وقىتۋ رايونىنىڭ اقىندار كلاسى، شينجياڭ ءوندىرىس - قۇرىلىس بيڭتۋانى، ءۇرىمجى قالاسى سياقتى ورىنداردان سارالانعان 48 ايتىس اقىنى قاتىناستى. ءۇش كۇنگە جالعاسقان ايتىس دوداسىندا اقىندار ۇلتتار ىنتىماعىن، ءداۋىر تىنىسىن، ورتالىقتىڭ شينجياڭ قىزمەتى ءماجىلىسىنىڭ رۋحىن، بەرەكە - بىرلىكتى، دوستىقتى، تىڭ تابىستار مەن جاڭا اۋقىمدى تارتىمدى ءتىل، ورامدى ويلارىمەن جاندى بەينەلەدى. سوڭىندا الامان بايگەدە اعالاپ العا شىققان جاميعا داۋلەت قىزى مەن گۇلسىماي توقان قىزى ەرەكشە سيلىققا، جارقىنبەك، قاليقان، زۋرا تىلەۋ قىزى، راقىمان، باقىتالى قاتارلى 5 اقىن 1 - دارەجەلى سيلىققا، اياكوز، قاناتبەك، ۇلاربەك، ناعىمان، شاكەن، رايقان، مۇرال، عازيزا، ەرلان، نۇرزيا قاتارلى 10 اقىن 2 - دارەجەلى سيلىققا، قىزمەت، گۇلايشا، ارناگۇل، زۋرا، ورال، ەركىن ءىلياس ۇلى، قۇزاربەك، ايىمقان قاتارلى 10 اقىن 3 - دارەجەلى سيلىققا يە بولدى. ءابدىعاني، ايعانىش، ەركىن، ناعىمان، شاكەن، ماقان، ەرجاننات، كادىرقان قاتارلى 26 اقىن اۆتونوميالى رايون جاعىنان «ۇزدىك اقىن» اتاعىن الدى. بۇدان تىس ءومىر بويى قازاقتىڭ ايتىس ونەرىن جالعاستىرىپ، ولەڭنىڭ تارلانبوز بايگەلەرى اتانعان قۇرمانبەك زەيتىنعازى ۇلى، جامالقان قاراباتىر قىزى، زيات كوبەگەن ۇلى، ءبۇبىماري جاقىپباي قىزى قاتارلى 4 اقىنعا «ومىرلىك ۇلەس سيلىعى» بەرىلدى. ايتىستىڭ جابىلۋ سالتىنا اۆتونوميالى رايوندىق ساياسي كەڭەستىڭ ءتوراعاسى اسحات كەرىمباي ۇلى، اۆتونوميالى رايوندىق حالىق قۇرىلتايى تۇراقتى كوميتەتىنىڭ ورىنباسار مەڭگەرۋشىسى الپىسباي راقىم ۇلى، اۆتونوميالى رايوننىڭ ورىنباسار ءتوراعاسى تىلەبالدى ابدىرەشىت ۇلى، اۆتونوميالى رايوندىق ساياسي كەڭەستىڭ ورىنباسار ءتوراعاسى قىزايجان سەيىلقوجا ۇلى، شينجياڭ اسكەري رايونىنىڭ ورىنباسار سىليڭيۋانى جارەكە بەكەش ۇلى قاتارلى باسشىلار قاتىناسىپ، جۇلدەگەر اقىندارعا سيلىق ۇسىندى. تاپەي قايىسقان ۇلى، بولات قازەز ۇلى، ىدىرىس ءادىلقانوۆ ۇزدىك باعالاۋشى دەپ ماداقتالدى. سوڭىندا تىلەبالدى ابدىرەشىت ۇلى ۇرپاقتان - ۇرپاققا جالعاسقان ايتىس ونەرىمىز جونىندە ماڭىزدى ءسوز سويلەدى ءارى ايتىس اقىندارىن ۇزدىكسىز تاربيەلەۋ، ساپالىلاندىرۋ، ايتىستى زەرتتەۋ، ونى ارناعا ءتۇسىرۋ جونىندە قۇندى پىكىرلەردى ورتاعا قويدى.

سۋرەتتە: ايتىستان ءبىر كورىنىس

سۋرەت توردان الىندى