ما چاۋشۇي جاپونيا سىرتقى ىستەر ءۋازىرىنىڭ جۇڭگوعا سوقتىعۋى جونىندە ءتىلشىنىڭ سۇراۋىنا جاۋاپ بەردى

ەلىمىز سىرتقى ىستەر مينيسترلىگىنىڭ مالىمدەمەشىسى ما چاۋشۇي مامىردىڭ 16 - كۇنى كورەيانىڭ كيونجو قالاسىندا جاپونيا سىرتقى ىستەر ءۋازىرىنىڭ يادرولىق قارۋ - جاراق قىسقارتۋ ماسەلەسىندە جۇڭگوعا قيسىنسىز سوقتىعۋى جونىندە ءتىلشىنىڭ سۇراۋىنا جاۋاپ بەردى.

ءتىلشى: ۇعىسۋعا قاراعاندا، مامىردىڭ 15 - كۇنى كورەيانىڭ كيونجو قالاسىندا وتكىزىلگەن 4 - رەتكى جۇڭگو - جاپونيا - كورەيا سىرتقى ىستەر مينيسترلەرىنىڭ ماجىلىسىندە جاپونيانىڭ سىرتقى ىستەر ءۋازىرى گاڭتيان كىيە يادرو ماسەلەسى جونىندە جۇڭگوعا قاراتا ءسوز سويلەپ، جۇڭگو يادرولىق قارۋ - جاراق قىسقارتۋ ۋادەسىن ورىندامادى دەگەن.

ما چاۋشۇي: جاپونيا جاقتىڭ جاۋاپكەرشىلىكسىز تۇردە سويلەگەن سوزىنە ەلىمىزدىڭ سىرتقى ىستەر مينيسترى ياڭ جيەچى ناق مايداندا تويتارىس بەردى ءارى بىلاي دەپ اتاپ كورسەتتى: جۇڭگونىڭ يادرو ستراتەگياسى مەن يادرو ساياساتى توتەنشە جاريالى، جۇڭگونىڭ يادرولىق قارۋ - جاراق قىسقارتۋ جونىندەگى دارىپتەمەسى مەن قۇلشىنىسىن جالپى جۇرت بىلەدى. جۇڭگو يادرولىق قارۋ - جاراقتارعا جاپپاي تيىم سالۋ جانە ونى تۇبەگەيلى جويۋدى باستان - اياق دارىپتەپ، ءوزىن قورعاۋ سىندى يادرو ستراتەگياسىن باتىل اتقارىپ كەلەدى، جۇڭگو يادرولىق قارۋ - جاراقتاردى الدىمەن ىستەتپەۋ، يادرولىق قارۋ - جاراعى جوق ەلدەر مەن يادرولىق قارۋ - جاراقسىز رايوندارعا يادرولىق قارۋ - جاراق ىستەتپەۋ نەمەسە ىستەتۋ جونىندە سەس كورسەتپەۋ ۋادەسىن بەرگەن بىردەن - ءبىر يادرولىق قارۋ - جاراعى بار ەل. جۇڭگو ءارقانداي فورماداعى يادرولىق قارۋ - جاراق باسەكەسىنە ەجەلدەن قاتىناسپاعان ءارى باسقا ەلدەرگە يادرولىق قارۋ - جاراق ورنالاستىرماعان.

جۇڭگو ءوزىنىڭ يادرولىق قارۋ - جاراق كۇشىن مەملەكەتتىڭ حاۋىپسىزدىك قاجەتىنىڭ ەڭ تومەنگى دەڭگەيىندە ۇزدىكسىز ساقتايدى.

(شينحۋا اگەنتتىگى)