|
جۇڭگو - موڭعۇليا شەكاراسىنداعى ۇلاستاي وتكەلى اشىلدى
مامىردىڭ 15 - كۇنى شينجياڭداعى جۇڭگو - موڭعۇليا ۇلاستاي وتكەلى بيىل تۇڭعىش رەت اشىلدى.
ۇلاستاي وتكەلى - شينجياڭدا ءۇرىمجى قالاسىنا ەڭ جاقىن قۇرلىقتىق وتكەل ءارى مەزگىلگە قاراي اشىلاتىن اشىق وتكەل، ءار جىلى ناۋرىز، مامىر، قىركۇيەك ايلارىنىڭ سوڭعى جارتىسىندا اشىلادى. بيىل ناۋرىز ايىندا تۇڭعىش رەت اشىلۋ مەزگىلىندە كۇن رايى ناشار بولىپ، قالىڭ قار جاۋعاندىقتان ۇلاستاي وتكەلىنەن جولاۋشى جانە جۇك اۆتوموبيلىنىڭ ءوتۋى قيىنعا سوقتى، ەكى جاق كەڭەسۋ ارقىلى وتكەلدىڭ اشىلۋ ۋاقىتىن ارتىنا شەگىندىردى.
ۇلاستاي وتكەلى - جۇڭگو مەن موڭعۇليا اراسىنداعى ماڭىزدى وتكەل. 1991 - جىلى ماۋسىم ايىندا ۇلاستاي وتكەلى رەسمي اشىلىپ، ەكى ەلدىڭ جولاۋشى، جۇك تاسىمالىنىڭ وتۋىنە رۇقسات ەتىلدى، الايدا جەرى ۇشى قيىرسىز ءشولدى جانە تاۋلى ءوڭىر بولعاندىقتان وتكەلدىڭ شارت - جاعدايى توتەنشە ناشار ەدى. وتكەن جىلدان بەرى جەرگىلىكتى ۇكىمەت قارجى قوسىپ، وتكەلدىڭ تاس جولى مەن وتكەلدىڭ كەڭسە ورنىن رەمونتتادى. بيىل وتكەلدىڭ تاس جولى تولىق تۇتاسىپ، وتكەلدىڭ بىرلەسىپ تەكسەرۋ ورنى دا ىسكە قوسىلىپ، وتكەلدىڭ ورتاسى ءبىرشاما جاقسارىپ، بەت - بەينەسى بۇكىلدەي وزگەردى، بۇل جەرگىلىكتى ورىننىڭ سىرتقى ەكونوميكاسىنىڭ دامۋىنا زور جەبەۋ بولماق.
(شينحۋا اگەنتتىگى) | 
