<%@LANGUAGE="JAVASCRIPT" CODEPAGE="65001"%>
中文 哈文

باس بەت>>اتامۇرا- اسىل قازىنا>>مادەنيەت

ەكى ولەڭ

 

قىستىڭ ءسانى ءبىر باسقا

توقتاۋباي ماكەباي ۇلى

ومبىلاپ قىستىڭ كۇمىس مامىق قارىن،
وي قۋىپ قارمەن بىرگە قالىقتادىم.
اققۋ قۇس كوك اسپاننىڭ ار جاعىنان،
تاراپ جاتقان سياقتى مامىقتارىن.

قىس تورعاي ءۇي ماڭايلاپ ۇشىپ قونىپ،
ۇيشىكتە ۇرپىيەدى كۇشىك توڭىپ.
كەتەدى تەرەزەمە سۋرەت سالىپ،
تۇنىمەن پەرىشتەلەر ۇشىپ كەلىپ.

اناۋ نە قوي سياقتى ورىستەگى،
اناۋ نە اقشا بۇلت پا كەڭىستەگى.
ال اناۋ اق بىيداي ما كۇنباعىس پا،
ديحاندار كەستەلەگەن ەگىستەگى.

ال اناۋ كوز جەتپەيتىن دارقان دالام،
كەزى جوق ءتوسىن اشىپ قارسى الماعان.
ال اناۋ اق شىتىنىڭ شىلدەرى عوي،
ۇسىنعان كەزىندەگى قالقام ماعان.

ال اناۋ التىنعولدىڭ بايتەرەگى،
ال مىناۋ مولا باسقان قاي توبە ەدى؟
ال اناۋ ۇلبىرەگەن قىز ەرىنى ،
سىيپاسام ەرىر مە ەدى قايتەر ەدى؟

اناۋ نە قۇبىجىق پا ماقۇلىق پا،
وزدەرى قاربالاس پا اسىعىس پا؟
ال اناۋ كەلە جاتقان اياز اتا،
ال جۇگىر الدىنان شىق اتىن ۇستا.

ءيت تۋرالى جىر

قازىنانىڭ ءبىر بولعان جارىقتىق،
تاۋ جاڭعىرتار داۋىسىڭا زارىقتىق.
ءبىزدىڭ ەلدىڭ يتتەرىنىڭ ەتتەرى،
بولعاننان سوڭ تابىلمايتىن «ازىقتىق».

مىنا ءبىر وي كۇيدىرەدى ءىشىمدى،
يتپەن بىرگە جوعالتام با قۇتىمدى.
قايران ءبىزدىڭ جولدى اياقتار سىرتتاندار،
ءيت جەيتۇعىن قۇلقىندارعا جۇتىلدى.

ءيت جوق اۋىل قۇلاققا ۇرعان تاناداي.
جان دۇنيەم قۇلازيدى قاراداي.
جاقسى كورگەن ويىنشىعىن جوعالتقان،
كەمسەڭدەيمىن باقشاداعى بالاداي.

جاڭعىرتقاندا جارتاستارمەن تاۋىڭدى،
ايۋ قاسقىر باسپايتۇعىن ماڭىمدى.
بۇل كۇندەردە ءمالىن شاۋىپ وتارعا،
قارساق تۇلكى تورىيدى كەپ اۋىلدى.

الىپسوقتار بارشىلىق ەد بۇل ەلدە،
تۇقىمدارى تۇزداي بولىپ تۇگەرمە.
تال تۇستەردە ۇرى ءتۇسىپ قامباعا ،
ءيت جوق بولعان نەتكەن قورلىق ۇرەرگە.

ءيتسىز قالدى اۋىل بىتكەن وبال ءا،
يەن اۋىل قاراقشىسىز بولاما،
جەمتىكتەردەن كوز اشپادى جەر انا،
قاسقىر ەركىن كىرىپ شىعاد قوراعا.

اۋىل بىتكەن ءيتسىز قالعان كۇندەردە،
قۇرعىر جۇرەك ءتىل المايدى كۇلگەنگە.
ءيت ۇنىمەن تۋرا تاپقان اۋىلىن،
اداسقاندار تاس قاراڭعى تۇندەردە.

ساقتا قۇداي اداسۋدى ساناتتان،
جول كەشكەندە تۇندەلەتىپ الاپتان.
ءيت جەيتۇعىن ادامداردان قورقاسىڭ،
ءيت جوق كەزدە الاتۇعىن بالاقتان.


 

 

ﯨﻠﻪ ﻗﺎﺯﺍﻕ ﺍﯙﺗﻮﻧﻮﻣﻴﺎﻟﻰ ﻭﺑﻠﯩﺴﺘﯩﻖ ﺣﺎﻟﯩﻖ ﯗﻛﯩﻤﻪﺗﻰ ﻛﻪﯕﺴﻪ ﻣﻪﯕﮕﻪﺭﻣﻪﺳﻰ ﯗﻳﯩﻤﺪﺍﺳﺘﯩﺮﻋﺎﻥ
ﯨﻠﻪ ﻗﺎﺯﺍﻕ ﺍﯙﺗﻮﻧﻮﻣﻴﺎﻟﻰ ﻭﺑﻠﯩﺴﺘﯩﻖ ﻩﻟﻪﻛﺘﺮﻭﻧﺪﻯ ﺍﻛﯩﻤﺸﯩﻠﯩﻚ ﯨﺴﺘﻪﺭ ﻛﻪﯕﺴﻪﺳﻰ باسقارادى  [新ICP备05001353号]
ﻩﻟﻪﻛﺘﺮﻭﻧﺪﻯ ﺍﻛﯩﻤﺸﯩﻠﯩﻚ ﯨﺴﺘﻪﺭ ﻛﻪﯕﺴﻪﺳﻰ ﺗﻪﺣﻨﻴﻜﺎﻟﯩﻖ ﺟﺎﻗﺘﺎﻥ ﺟﻪﺗﻪﻛﺸﯩﻠﯩﻚ ﻩﺗﻪﺩﻯ